Latest entries

fimmtudagur, 1. mar 2018

Aðalfundur Sagnfræðingafélagsins

Aðalfundur Sagnfræðingafélags Íslands 2017 verður haldinn þriðjudagskvöldið 13. mars í fyrirlestrasal Þjóðskjalasafns Íslands, Laugavegi 162 (3. hæð, gengið inn úr portinu).

Aðalfundarstörf hefjast kl. 20:00, sjá nánari dagskrá að neðan. Að þeim loknum, kl. 20:45, munu höfundar tveggja nýrra fræðiverka sem tilnefnd voru til Íslensku bókmenntaverðlaunanna 2017 kynna bækurnar og sitja fyrir svörum.

Sagnfræðingarnir Anna Agnarsdóttir og Helgi Þorláksson munu kynna tveggja binda verkið Líftaug landsins. Saga íslenskrar utanlandsverslunar 900-2010. Steinunn Kristjánsdóttir fornleifafræðingur mun kynna bók sína Leitin að klaustrunum. Klausturhald á Íslandi í fimm aldir, en auk tilnefningarinnar til Íslensku bókmenntaverðlaunanna hlaut Steinunn fyrir bókina Viðurkenningu Hagþenkis.

Dagskrá aðalfundarins er sem hér segir:
1. Ársskýrsla stjórnar kynnt og lögð fram til samþykktar.
2. Endurskoðaðir ársreikningar félagsins kynntir og lagðir fram til samþykktar.
3. Ákvörðun árgjalds fyrir næsta starfsár.
4. Kjör ritara og tveggja endurskoðenda reikninga.
5. Önnur mál.

Eftir fundinn verður boðið upp á léttar veitingar.

föstudagur, 16. feb 2018

Hádegisfyrirlestur 20. febrúar: Sagan á sýningu? Um aðferðafræði safna og vinnu sagnfræðinga við miðlun sögu á Sjóminjasafninu í Reykjavík

Þriðjudaginn 20. febrúar flytja Anna Dröfn Ágústsdóttir og Guðbrandur Benediktsson erindið „Sagan á sýningu? Um aðferðafræði safna og vinnu sagnfræðinga við miðlun sögu á Sjóminjasafninu í Reykjavík.“ Fyrirlesturinn hefst kl. 12:05 og fer fram í fyrirlestrarsal Þjóðminjasafns Íslands. Þetta er þriðji fyrirlestur vormisseris í röð fyrirlestra sem Sagnfræðingafélag Íslands skipuleggur í samvinnu við Þjóðminjasafnið.

Nú er unnið að því að setja upp nýja grunnsýningu á Sjóminjasafninu í Reykjavík, sem er hluti af Borgarsögusafni Reykjavíkur, en sýningin mun verða opnuð í júní. Síðustu ár hefur hópur sérfræðinga unnið að undirbúningi sýningarinnar, en leitast er við að lýsa sögu og þróun helsta atvinnuvegar þjóðarinnar á hnitmiðaðan máta, með áherslu á 20. aldar sögu og útgerð frá Reykjavík. Guðbrandur Benediktsson safnstjóri Borgarsögusafns og Anna Dröfn Ágústsdóttir sagnfræðingur og umsjónarmaður sýningahandrits munu segja frá margþættri vinnu við sýninguna. Í erindinu verður fjallað um aðferðarfræði og hugmyndir á söfnum og innan safnafræði við sýningagerð og vinnu sagnfræðinga við grunnsýningu Sjóminjasafnsins. Rætt verður um undirbúning og afmörkun rannsóknar, helstu efnisþætti sýningarhandrits og miðlunarleiðir.

Guðbrandur Benediktsson er safnstjóri Borgarsögusafns Reykjavíkur. Hann er með MA gráður í sagnfræði frá Háskóla Íslands og safnafræði frá Gautaborgarháskóla. Megináherslur hans í rannsóknum hafa snúið að ljósmyndum annars vegar og miðlun sögu hins vegar. Guðbrandur hefur kennt námskeið í sagnfræði, safnafræði og hagnýtri menningarmiðlun við Háskóla Íslands, sem og ferðamálafræði.

Anna Dröfn Ágústsdóttir er aðjúnkt og fagstjóri við Listaháskóla Íslands. Hún er með MA gráðu í bæði sagnfræði og hagnýtri menningarmiðlun frá Háskóla Íslands. Í rannsókn sínum hefur Anna Dröfn skoðað fjölbreytta þætti reykvísks borgarlífs en hún hefur meðal annars skoðað þéttbýlisþróun, heilbrigðis- og húsnæðismál, skipulag og byggingarlist í Reykjavík. Árið 2013 kom út bókin Reykjavík sem ekki varð sem Anna Dröfn skrifaði ásamt Guðna Valberg arkitekt. 

fimmtudagur, 15. feb 2018

Hlaðvarp/myndband: Vilhelm Vilhelmsson: Brothætt frá upphafi. Byggðarsaga Borðeyrar við Hrútafjörð

föstudagur, 2. feb 2018

Hádegisfyrirlestur 6. febrúar: Brothætt frá upphafi. Byggðarsaga Borðeyrar við Hrútafjörð

Þriðjudaginn 6. febrúar flytur Vilhelm Vilhelmsson erindið „Brothætt frá upphafi. Byggðarsaga Borðeyrar við Hrútafjörð“. Fyrirlesturinn hefst kl. 12:05 og fer fram í fyrirlestrarsal Þjóðminjasafns Íslands. Þetta er annar fyrirlestur vormisseris í röð fyrirlestra sem Sagnfræðingafélag Íslands skipuleggur í samvinnu við Þjóðminjasafnið.

Í útdrætti erindisins segir: Borðeyri við Hrútafjörð er líklega minnsti þéttbýliskjarni landsins. Þar búa um tíu manns. En á síðari hluta 19. aldar var bærinn miðstöð verslunar í héraðinu. Bændur komu hundruðum saman langa vegu á kauptíð og umsvifamiklir og stórhuga kaupmenn byggðu þar upp viðskiptaveldi. Þar var blómlegt menningarlíf og miðstöð fólksflutninga og millilandaverslunar. Með komu landssímans í byrjun 20. aldar varð símstöðin á Borðeyri mikilvægur tengiliður á milli landsfjórðunga. Bærinn ber þessara umsvifa enn merki. Þrátt fyrir það varð Borðeyri aldrei að fjölmennum kaupstað með fjölbreyttri starfsemi og mikilvægi hans fór hratt minnkandi þegar leið á 20. öld. Bærinn er nú ekki svipur hjá sjón og þar hefur ekki verið rekin verslun í meira en áratug. Í þessu erindi verður byggðarsaga staðarins rakin og velt vöngum yfir því hvers vegna byggð á Borðeyri hefur reynst jafn brothætt og raun ber vitni.

Vilhelm Vilhelmsson (f. 1980) er doktor í sagnfræði frá Háskóla Íslands. Hann er annar af tveimur ritstjórum Sögu, tímarits Sögufélags, og hefur verið sjálfstætt starfandi fræðimaður undanfarin ár.

fimmtudagur, 1. feb 2018

Hlaðvarp/myndband: Hjörleifur Stefánsson: Torfhúsabærinn Reykjavík. Híbýli tómthúsmanna á 19. öldinni

föstudagur, 19. jan 2018

Hádegisfyrirlestur 23. janúar: Torfhúsabærinn Reykjavík. Híbýli tómthúsamanna á 19. öldinni

Þriðjudaginn 23. janúar flytur Hjörleifur Stefánsson erindið „Torfhúsabærinn Reykjavík. Híbýli tómthúsamanna á 19. öldinni“. Fyrirlesturinn hefst kl. 12:05 og fer fram í fyrirlestrarsal Þjóðminjasafns Íslands. Þetta er fyrsti fyrirlestur vormisseris í röð fyrirlestra sem Sagnfræðingafélag Íslands skipuleggur í samvinnu við Þjóðminjasafnið.

Í útdrætti erindisins segir: Sú byggingarsaga Reykjavíkur fram til byrjunar 20. aldar sem er aðgengileg almenningi fjallar að mestu leyti um húsakost og híbýli þeirra sem bjuggu við best kjör, verslunarmenn og embættismenn. Engu að síður bjó meira en helmingur íbúa Reykjavíkur í torfhúsum fram undir aldamótin 1900 og segir fátt af þeim. Gerð verður grein fyrir heimildum um torfhúsabyggð í Reykjavík frá upphafi fram til miðrar 18. aldar og skýrður munur á húsakosti leiguliða og bænda. Fjallað verður ítarlega um híbýlahætti tómthúsmanna og hvernig þeir þróuðust á seinni hluta 19. aldar út torfhúsum í steinbæi. Sýndar verða ljósmyndir og teikningar af öllum húsagerðum eftir því sem heimildir gefa tilefni til.

Hjörleifur Stefánsson er arkitekt að mennt og hefur mestallan sinn starfsferil rekið eigin teiknistofu og unnið að verkefnum sem tengjast varðveislu byggingararfs. Um skeið var hann sviðsstjóri útiminjasviðs Þjóðminjasafns Íslands. Hann hefur skrifað nokkrar bækur um byggingarsögu auk bókar um staðaranda Reykjavíkur og siðfræði byggingarlistar.

föstudagur, 5. jan 2018

Hádegisfyrirlestrar Sagnfræðingafélagsins vor 2018

23. janúar
Hjörleifur Stefánsson: Torfhúsabærinn Reykjavík. Híbýli tómthúsmanna á 19. öldinni

6. febrúar
Vilhelm Vilhelmsson: Brothætt frá upphafi. Byggðarsaga Borðeyrar við Hrútafjörð

20. febrúar
Anna Dröfn Ágústsdóttir og Guðbrandur Benediktsson: Sagan á sýningu? Um aðferðafræði safna og vinnu sagnfræðinga við miðlun sögu á Sjóminjasafninu í Reykjavík

6. mars
Arnþór Gunnarsson: Reykjavíkurflugvöllur. Flugvallarmálið fram að atkvæðagreiðslunni um framtíð flugvallarins árið 2001

20. mars
Óðinn Melsted: Umskiptin frá húshitun með olíu og kolum til jarðvarma 1930–1980

3. apríl
Íris Ellenberger: Delludanska, toddýsgildi og verkamenn moldugir frá verki sínu. Mót, átök og samblöndun menningar í Reykjavík 1900–1920

17. apríl
Haraldur Sigurðsson: „Húsin sem eiga að standa“. Tillögur að bæjarskipulagi 1921-1938 og byggingararfur íslensks þéttbýlis

Allir fyrirlestrar eru haldnir í fyrirlestrasal Þjóðminjasafns Íslands, hefjast klukkan 12:05 og lýkur klukkan 13:00

sunnudagur, 31. des 2017

Hlaðvarp/myndband: Þorsteinn Vilhjálmsson: Að hafa svo mikið upp úr lífinu sem auðið er Ólafur Davíðsson og hinsegin rými innan Lærða skólans á 19. öld

Hlaðvarp/myndband: Sólveig Ólafdóttir: Rosenwein og Reddy. Fræðilegar samræður um sögulegar tilfinningar

Hlaðvarp/myndband: Ólína Kjerúlf Þorvarðardóttir: Gullkistan Djúp. Þróun byggðar og mannlífs við Ísafjarðardjúp


This page

Um félagið

Sagnfræðingafélag Íslands er fagfélag íslenskra sagnfræðinga. Sem slíkt er það vettvangur fyrir umræður um sérfagleg málefni, en jafnframt vill það stuðla að þverfaglegum rökræðum um vísindi og fræði almennt. Félagið stendur reglulega fyrir opnum félagsfundum, ráðstefnum, og ýmsum fagtengdum fundum.

Póstfang félagsins er:
Sagnfræðingafélag Íslands
ReykjavíkurAkademían
Þórunnartún 2
IS-105 Reykjavík

Tölvupóstfang félagsins er: sagnfraedingafelagid@gmail.com

Einnig má hafa samband við Kristínu Svövu Tómasdóttur, formann Sagnfræðingafélagsins, í gegnum tölvupóstfangið kristinsvava@gmail.com

About the Association

The Icelandic Association of Historians can be contacted via email: sagnfraedingafelagid@gmail.com.

Search this page


Gammabrekka

Við minnum á póstlista sagnfræðinga. Þar fara daglega fram líflegar umræður um spennandi málefni.

Skráðu þig á Gammabrekku.

Random image

Hádegisfyrirlestrar Sagnfræðingafélagsins haust 2018

18. september
Valur Gunnarsson: Á milli Hitlers og Stalín: Mestu hörmungartímar Norðurlanda á 20. öld

2. október
Guðmundur Jónsson: Refsing guðs, náttúruhamfarir eða samfélagsmein? Um orsakir hungursneyða á Íslandi

16. október
Erla Dóris Halldórsdóttir og Magnús Gottfreðsson: Áhrif spænsku veikinnar á barnshafandi konur á Íslandi árið 1918

30. október
Atli Antonsson: Menningarsaga eldgosa á Íslandi frá Skaftáreldum til nútímans

13. nóvember
Ásta Kristín Benediktsdóttir og Hafdís Erla Hafsteinsdóttir: Mesti óvinur mannkyns, hórsótt eða eyðni? Orðræður um HIV á Íslandi

27. nóvember
Vilborg Auður Ísleifsdóttir: Hungursneyðir og hremmingar á 16. öld

Allir fyrirlestrar eru haldnir í fyrirlestrasal Þjóðminjasafns Íslands, hefjast klukkan 12:05 og lýkur klukkan 13:00


RSS for entries. RSS for comments.

Powered by WordPress. Valid XHTML & CSS.

Fótur

Sagnfræðingafélag Íslands - Sími: 661-2671- Tölvupóstur: sagnfraedingafelagid@gmail.com