þriðjudagur, 20. ágú 2019

Fyrirlestrar um trú og samfélag

Haustið er handan við hornið og það þýðir fyrst og fremst eitt: ný fyrirlestraröð Sagnfræðingafélags Íslands hefst innan skamms. Umfjöllunarefnið að hausti er trú og samfélag í víðum skilningi. Mikil viðbrögð voru við kalli eftir erindum. Tillögurnar sem bárust voru margar og erfitt að gera upp á milli þeirra. Á endanum urðu sjö erindi fyrir valinu.

Fyrsti fyrirlesturinn verður miðvikudaginn 11. september. Það er óvenjulegur fundardagur og ræðst af utanaðkomandi þáttum. Þetta verður hins vegar í eina skiptið sem brugðið er út af venjulegum fundartíma í haust. Hinir fyrirlestrarnir verða allir á þriðjudegi eins og hefð er fyrir.

Helgi Þorláksson ríður á vaðið á óvenjulegum fundartíma, miðvikudaginn 11. september. Helgi flytur erindið: Þið munið hann Þorlák. Skálholt á kaþólskri tíð og lútherskri. Þar fjallar hann um trú á Þorlák helga Þórhallsson á kaþólskri tíð og hvernig hann skipti landsmenn höfuðmáli öldum saman.

Hjalti Hugason fjallar um breytingar á útfararsiðum landsmanna á fyrri hluta 20. aldar, í fyrirlestri 24. september. Hann fjallar einkum um greftranir í heima- og heimilisgrafreitum.

Rakel Edda Guðmundsdóttir fjallar um umræður og átök um guðfræði og trú, þjóðkirkju og fríkirkju á síðum íslenskra dagblaða í kringum aldamótin 1900. Rakel Edda vinnur að meistararitgerð um efnið og líkur námi í haust. Fyrirlestur hennar verður 8. október.

Sverrir Jakobsson fjallar 22. október um Jesúm Krist í ljósi kenninga um menningarlegt minni. Hann spyr hvers vegna myndin af Kristi var mismunandi í ólíkum heimildum um hann strax á fyrstu öld og hvernig þær þróuðust í framhaldinu.

Þann 5. nóvember fjallar Þorsteinn Helgason um Tyrkjaránið og spyr hvort það hafi verið trúarlegur viðburður. Hvernig brást sjálfsvitund kristinna við því að færast skyndilega inn í lífheim íslams?

Bryndís Björgvinsdóttir fjallar um álfasteina og aðra bannhelga bletti í náttúru landsins og átrúnað þeim tengdum 19. nóvember. Hún tengir hjátrú á álfa og bannhelgi við náttúruvernd út frá náttúruhverfum viðhorfum manns til náttúru.

Kirkjuvaldsstefnan og trúarleg orðræða á þjóðveldisöld er inntakið í fyrirlestri Haraldar Hreinssonar 3. desember. Hann fjallar um upphaf kirkjustefnunnar og hvort best sé að greina hana með aðferðum persónu- og stofnanasögu eða aðferðum menningarsögu.


This page

Um félagið

Sagnfræðingafélag Íslands er fagfélag íslenskra sagnfræðinga. Sem slíkt er það vettvangur fyrir umræður um sérfagleg málefni, en jafnframt vill það stuðla að þverfaglegum rökræðum um vísindi og fræði almennt. Félagið stendur reglulega fyrir opnum félagsfundum, ráðstefnum, og ýmsum fagtengdum fundum.

Póstfang félagsins er:
Sagnfræðingafélag Íslands
ReykjavíkurAkademían
Þórunnartún 2
IS-105 Reykjavík

Tölvupóstfang félagsins er: sagnfraedingafelagid@gmail.com

Einnig má hafa samband við Markús Þ. Þórhallsson, formann Sagnfræðingafélagsins, í gegnum tölvupóstfangið mth39@hi.is

About the Association

The Icelandic Association of Historians can be contacted via email: sagnfraedingafelagid@gmail.com.

Search this page


RSS for entries. RSS for comments.

Powered by WordPress. Valid XHTML & CSS.

Fótur

Sagnfræðingafélag Íslands - Sími: 661-2671- Tölvupóstur: sagnfraedingafelagid@gmail.com