föstudagur, 12. mar 2010

Vandræðalegir víkingar. Ímynd-arfur-tilfinningar

Katla Kjartansdóttir þjóðfræðingur flytur erindið Vandræðalegir Víkingar. Ímynd - Arfur – Tilfinningar þriðjudaginn 16. mars kl. 12.05 í fyrirlestrasal Þjóðminjasafns Íslands.

Fyrir örfáum árum tóku hugtökin „útrás“ og „útrásarvíkingar“ að óma í íslensku samfélagi. Fjölmiðlar, forsetinn og fleiri tóku þau upp á sína arma og gáfu þeim bæði merkingu og þunga. Í erindi sínu mun Katla rýna í þessa tilteknu orðræðu þar sem greina má vinsæla (en stundum vandræðalega) samfléttun þjóðararfs og viðskipta.
Þjóðararfur er vandræðahugtak og það er víkingahugtakið líka. Samtvinnun þeirra í samfélagslegri orðræðu um viðskipti Íslendinga erlendis er því vandmeðfarin - og jafnvel vandræðaleg. Í fyrirlestrinum verður varpað ljósi á hvernig hin óljósa merking þeirra hefur verið nýtt með margvíslegum hætti í gegnum tíðina. Lengi vel var það einkum ferðamanna- og menningararfsiðnaðurinn sem gældi við þá hugmynd að Íslendingar væru afkomendur víkinga, t.d. með sölu „víkingahjálma“ í minjagripaverslunum og áður en menn vissu af var „ekta víkingaþorp“ risið í Hafnarfirði. Einnig má nefna frægðarför víkingaskipsins Íslendings til Vesturheims sem nú má skoða í Víkingaheimum skammt frá Keflavíkurflugvelli.
Íslenskir sagnfræðingar hafa ekki verið á eitt sáttir um þessa „víkingaarfsvæðingu“ og má í því sambandi minnast á ritdeilu um ristastórt víkingasverð sem reisa átti á Melatorgi við enduropnum Þjóðminjasafns Íslands árið 2004. Sagnfræðingar, og aðrir fræðimenn, veittu einnig orðræðunni um hina svokölluðu “útrásarvíkinga” andóf en hlutu lítinn hljómgrunn.
Nú í upphafi 21. aldar, á tímum hnattvæðingar og menningarlegrar fjölbreytni, hljóta vinsældir slíkrar þjóðernisorðræðu þó að vekja nokkra furðu. Hugmyndafræði nýfrjálshyggju og síðkapítalisma hefur á undanförnum árum gegnsýrt íslenskt samfélag og þar með menningarstefnu ríkisins. Leiða má að því líkum að markaðsvæðing þjóðararfsins sé angi af þeirri stefnu.
Erindi Kötlu er hluti af hádegisfyrirlestraröðinni Hvað er dómur sögunnar? og er fundurinn ókeypis og aðgangur öllum opinn.

This page

Um félagið

Sagnfræðingafélag Íslands er fagfélag íslenskra sagnfræðinga. Sem slíkt er það vettvangur fyrir umræður um sérfagleg málefni, en jafnframt vill það stuðla að þverfaglegum rökræðum um vísindi og fræði almennt. Félagið stendur reglulega fyrir opnum félagsfundum, ráðstefnum, og ýmsum fagtengdum fundum.

Póstfang félagsins er:
Sagnfræðingafélag Íslands
ReykjavíkurAkademían
Þórunnartún 2
IS-105 Reykjavík

Tölvupóstfang félagsins er: sagnfraedingafelagid@gmail.com

Einnig má hafa samband við Kristínu Svövu Tómasdóttur, formann Sagnfræðingafélagsins, í gegnum tölvupóstfangið kristinsvava@gmail.com

About the Association

The Icelandic Association of Historians can be contacted via email: sagnfraedingafelagid@gmail.com.

Search this page


RSS for entries. RSS for comments.

Powered by WordPress. Valid XHTML & CSS.

Fótur

Sagnfræðingafélag Íslands - Sími: 661-2671- Tölvupóstur: sagnfraedingafelagid@gmail.com