Að endurheimta augnablikið: Þjóðfræði, kvikmyndatækni og írónía

Þriðjudaginn 6. maí flytur Kristinn Schram hádegisfyrirlesturinn Að endurheimta augnablikið: Þjóðfræði, kvikmyndatækni og írónía. Kristinn er forstöðumaður Þjóðfræðistofu, stundakennari við H.Í og doktorsnemi við Edinborgarháskóla.

Er kvikmyndun sjálfsagt tæki í vettvangsrannsóknum? Verður menning varðveitt í hreyfimynd og hljóði og síðan endurupplifuð? Hvers eðlis eru þjóðfræðilegar kvikmyndir? Hafa kvikmyndir eðli? Í fyrirlestrinum verður fjallað um kosti og galla kvikmyndatækni við þjóðfræðilegar rannsóknir og tekin dæmi af rannsóknum Kristins frá bæði Íslandi og Skotlandi. Með hliðsjón af vettvangs- og varðveisluaðferðum fyrr og nú skoðar hann fyrirbæri eins og sjálfsmynd, 'performans', menningarf og íróníu og hvernig megi nálgast þau á tímum stafrænnar tækni og usla í þjóðernisumræðu.

Hádegisfyrirlestrar Sagnfræðingafélagsins fara fram í fyrirlestrasal Þjóðminjasafnsins og standa frá klukkan 12.05 til klukkan 12.55. Aðgangur er ókeypis og öllum heimill.